مقادير فخاد الدجاج بالدنجال معسل :
2دنجالات كبار
2 بصلات مشلضين
ثومة
راس الحانوت
عويد قرفة
سكنجبير
زعفران شعرة او خرقوم
ملح
ابزار
سمن اختياري
زيت زيتون
سكر
قرفة
ماء الزهر لي كيعجبو
2 معالق كبار عصير حامض
طريقة تحضير فخاد الدجاج بالدنجال معسل :
ناخدو الدنجال ونغسلوه و نقطعوه دوائر نديروليه الملح و نوضعوه فشي شبكة حتى يستقطر
ناخدو طنجرة نديرو فخيدات الدجاج و نزيدو عليهم البصلة , الثومة , راس حانوت , سكنجبير , خرقوم , ابزار , ملح , سمن , عصير الحامض و عويد القرفة نشرملو الفخيدات مزيان و نخليوهم يترقدو فالخليط شي ساعة او ساعتين . من بعد نشعلو على الطنجرة عافية مهيلة و نخليو الفخيدات كيتشحرو و كيتشربو العطرية لي ترقدو فيها , نزيدو زويتة و كويس ماء و نخليو الفخيدات حتى يطيبو.
ندوزو الدنجال فالدقيق و نقليوه
من بعد نقطعوه و نعسلوه بالسكر و القرفة و لي بغا شوية ماء الزهر يضيفو
من بعد ما يتعسل نديروه فشي صفاية حتى يتصفى من الزيت لي فيه
من بعد ما طابو الفخيدات نزولوهوم من المريقة و ندهنوهوم بالزبدة مخلطة مع شويش ديال السمن و ندخلوهوم الفران يتحمرو .
ناخدو المريقة و نصفيوها و الى كانت مزالة جارية ردوها تغلى حتى تولي عاقدة .
نكبو المريقة فطبق التقديم ثم الفخيدات و نزينو بالدنجال معسل و اللوز مقلي و البيض مسلوق
